Sunday, November 22, 2009

सी बूंद तौं गलोड्यों मा !


त्वै मेरी बांद, मी बतौण ही पड्लु कि
आज इथ्गा उदास किलै च तेरु मन,
सी तरपर ओंस तेरी आंखि छ्न ढोल्णी
कि तौ गलोड्यों मुंद बूंद सी, बरखैगी छन ।

मी सी कनी कैकि भी नि छुप्ये सकदीन
तु ढौक जथा भी तौं तै धोति का पल्लन,
सी तरपर ओंस तेरी आंखि छ्न ढोल्णी
कि तौ गलोड्यों मुंद बूंद सी, बरखैगी छन ।

यु हैंस्दु बुरांस भी तन किलै मुरझायुं
घाम छैलेगि हो रौली-बौल्यों कु जन,
सी तरपर ओंस तेरी आंखि छ्न ढोल्णी
कि तौ गलोड्यों मुंद बूंद सी, बरखैगी छन ।

आज मी तै यख बिटी अडेथ्ण का बाद
कब तक रुऔली तु तौं आंखियों तै तन,
सी तरपर ओंस तेरी आंखि छ्न ढोल्णी
कि तौ गलोड्यों मुंद बूंद सी, बरखैगी छन ।

तेरा जाण का बाद, अकेली रालू जब मै
मी तेरी याद का सुपिना आला कन-कन,
यी तरपर ओंस जु मेरी आंखी छन ढोल्णी
दग्ड्या तेरी खुदमा मेरा दिल की बाडुली छन ।

Sunday, November 1, 2009

मिन नी घड्काई आज !

तन किलै रडकाई तिन सी, पीठी मकौ भारू,
मिन नी घड्काई आज, गोरख्याणी कू दारू,
मेरु क्वी नी दोष गैला दोष दग्ड्यों कु सारू,
भलु मन्खी बणिग्यों चुची, अब मी बिचारू,
तेरी कसम, तु जै का मर्जी सौं खिलै ली,
मिन आफु नि पिनी दग्ड्योंन पिलै ली,
कुछ भी नी रैयूं अब मेरा कीसा परै,
तु जथगा मर्जी तै बटुआ हिलै ली,
अब कुछ नि रैगी पैण कु चारू,
तन किलै रड्काई तिन,
स्यू पीठी मकौ
भारू,
चुची,
भलु
मन्खी बणी
ग्यों अब मी बिचारू !
मिन नी घड्काई आज
चुची,गोरख्याणी कू दारू!!