क्वी सेरों का अर क्वी उखडी,
क्वी धैड़ो का, क्वी गंगाड्या,
सैणा क्वी क्वी डांडा-कांठा का,
पर छाँ त सब्बी व़े माटा का।
क्वी बिडाळ क्वी ढीस्वाळ का,
क्वी उकाळ अर क्वी उन्द्यार,
आडा-तिरछा, सीधा बाटा का,
पर छाँ त सब्बी व़े माटा का।
तंत मन्ख्यों की कै जात छन,
सब्बी एक्की जना ह्वे नी सक्दां
चक्डैती क्वी त क्वी लाटा का,
पर छाँ त सब्बी व़े माटा का।
कैगा दिंया-लिंयांन क्या होंदु,
दिन त सब्बुका छन कटेणां,
क्वी खैरी त क्वी ठाठ-बाट का,
पर छाँ त सब्बी व़े माटा का।
No comments:
Post a Comment