एक गढ़वाली गीत- तू ऐजा !

पढ़यु-लेख्युं नौनु छौ मी,
कुछ नी चैन्दु दैजा !
बस कूड़ी-भांडी खेल्ण कु,
तू मी दगडा मा ऐजा !!
लछी मी दगडा मा ऐजा ,
चूची मी दगडा मा ऐजा ,

घर कु काम मी करलू
तू फिक्र ना कर धाणी की !
नी सहेंदी पीढा मी सी,
ये तरसदा प्राणी की !!
कब तकै अकेलु रों मी ,
तू मी दगडी रैजा,
पढ़यु-लेख्युं नौनु छौ मी,
कुछ नी चैन्दु दैजा !
लछी मी दगडा मा ऐजा ,
चूची मी दगडा मा ऐजा ,

तेरी खुशी का बाना मी,
कुछ भी खालू खैरी !
बोंण-धाण मी देखलू तू,
घरमु रै लै-पैरी !!
गुड की गेंदुडी मी खालु
तू गुलगुला खैजा,
पढ़यु-लेख्युं नौनु छौ मी,
कुछ नी चैन्दु दैजा !
लछी मी दगडा मा ऐजा ,
चूची मी दगडा मा ऐजा ,

यखुली च प्राणी मेरु ,
दगडया एक चैन्दी !
ज्वानी की झौल चूची ,
सदानी इन्नी नी रैन्दी !!
भटकी गयुं ये बोंण मा
तु मी बाट्टू बतै जा,
पढ़यु-लेख्युं नौनु छौ मी,
कुछ नी चैन्दु दैजा !
बस तू कूड़ी-भांडी खेल्ण कु,
मी दगडा मा ऐजा !!
लछी मी दगडा मा ऐजा ,
चूची मी दगडा मा ऐजा