खैरी अपणी !

कै मा लगौण खैरी अपणी, कैगी  सांखी परै रोण,   

ई छोड़-कूडी का खातिर,अछाणा मा धरीं च मोण। 

  

डांडा-गदन्यों का सैरा सूखा पड्यां छुंया-दुङ्ग्ला, 

पाणि नी च कै भि धारा, मुक्क भी कखन धोंण।  

मैना का शुरुमा लोग रैंदा,मंयोडर कु बाटु हेरना,   

कुठारी नीच नाज-दाणी,क्यजु खांण अर कमोंण।

नौनौ अर ऊँ तै चैंदु, भरीं रोटी मा घी कु गोंदगु,  

गुठ्यारा बंधी भैंसी-गौडी,घास नीच कखी बौण। 

  

अपणि सूखी रोटी जाणू, अर कोस्डी परौ लोण,

कै मा लगौण खैरी अपणी, कैगी  सांखी परै रोण।